මහාචාර්ය ගුණපාල මලලසේකර මහතාගේ 125 ජන්ම දිනය නිමිත්තෙන් ග්‍රන්ථයක් එළිදක්වයි
ශ්‍රී ලංකාවේ ප්‍රවීණ විද්වතෙකු මෙන්ම සංස්කෘතික උපදේශකයෙකු වූ මහාචාර්ය ගුණපාල පියසේන මලලසේකරයන්ගේ 125 වැනි ජන්ම දිනය සමරමින් මලලසේකර පදනම විසින් “Professor Gunapala Malalasekera: A Photographic Portrait” නමින් ග්‍රන්ථයක් පසුගියදා එළිදක්වන ලදී. කොළඹ ජාතික ලේඛනාරක්ෂක දෙපාර්තමේන්තු ශ්‍රවණාගාරයේ පැවැති මෙම වැඩසටහන සඳහා එතුමාගේ පවුලේ සාමාජිකයන් , ප්‍රවිණ විද්වතුන් සහ සිවිල් ක්‍රියාකාරීන් රැසක් සහභාගී විය. පූජ්‍ය වෑතර මහින්ද මාහිමිපාණන් විසින් වසර හතරක් පුරා සිදුකරන ලද පර්යේෂණයකින් පසුව රචනා කරන ලද මෙම උපහාර ග්‍රන්ථයේ මූලික අරමුණ වන්නේ, ශ්‍රී ලංකාවේ අධ්‍යාපනය , බෞද්ධ ආගම සහ සංස්කෘතික උරුමයේ අභිවෘද්ධිය වෙනුවෙන් මහාචාර්ය ගුණපාල මලලසේකරයන්ගේ අනුපමේය දායකත්වය ඇගයීමය.
GPM යන අන්වර්ථ නාමයෙන් හඳුන්වනු ලබන මහාචාර්ය මලලසේකරයන් මෙරට යටත් විජිත පාලන සමයේ පැවැති අභියෝග මධ්‍යයේ අධ්‍යාපන ප්‍රතිසංස්කරණ හා ජාතික අභිමානයේ උන්නතිය වෙනුවෙන් සිය ජිවිතය කැප කළ දූරදර්ශි විද්වතෙකි. බෞද්ධ අධ්‍යාපනය පිළිබඳ ප්‍රවීණයන්ගේ ආභාෂය ලැබූ ඔහු ශ්‍රී ලංකාවේ ජාතික අධ්‍යාපන ක්‍රමය විධිමත්ව ගොඩනැගීමට සහ පරම්පරා ගණනාවක් පුරා සංස්කෘතික වටිනාකම් ව්‍යාප්ත කිරීමට සැලකිය යුතු කාර්යභාරයක් ඉටුකරන ලදී.
මෙම ග්‍රන්ථයේ කතුවරයා වන පූජ්‍ය වෑතර මහින්ද මාහිමිපාණන් වහන්සේ විසින් මෙම සූවිශේෂි වැඩසටහන පිළිබඳව සිය අදහස් බෙදාගන්නා ලදී. “මෙම කෘතිය එළිදැක්වීමේ මූලික අදහස පහළ වූයේ, මහාචාර්ය ගුණපාල මලලසේකර මහතා පිළිබඳව මීට පෙර පළ වූ පොත්පත් කියවීමෙන් පසුවයි. එම පොත්පත් අධ්‍යයනය කිරීමේදී එතුමා විසින් බුදුදහමට හා අපේ රටට සිදුකර ඇති මෙහෙවර සම්පුර්ණයෙන් ග්‍රහණය කරගෙන නැති බව මට වැටහුණා. එබැවින් මහාචාර්ය මලලසේකරයන් විසින් නිර්වචනය කළ සැබෑ ජිවන අත්දැකීම් ජිවමාන කිරීම සඳහා එතුමාගේ ජිවිතය ඇතුළත් පුළුල් නිර්මාණයක් සිදු කිරීමේ දැඩි අවශ්‍යතාවයක් මට දැනුණා. මෙම අරමුණ පෙරදැරී කරගෙන ආරම්භ කරන ලද පුළුල් පර්යේෂණ ගමනේදී මලලසේකරයන්ගේ උරුමය සෑබැ ලෙසම ජනගත කිරීමේ අරමුණින් මා රට පුරා සංචාරය කරනු ලැබුවා. මෙම කෘතිය ඔස්සේ ඔහුගේ විශිෂ්ට ජිවිතයේ අමිල මෙහෙවර පාඨකයන්ට සමීප කිරීම මාගේ අරමුණයි.”
මහාචාර්ය මලලසේකර මහතාගේ මුණුපුරා වන මලලසේකර පදනමේ සභාපති අශාන් මලලසේකර මෙම අවස්ථාව පිළිබඳව මෙසේ සිය අදහස් දැක්වුවේය. ” මලලසේකර පදනම සහ අපේ පවුල වෙනුවෙන් වෑතර මහින්ද මාහිමිපාණන් විසින් සම්පාදනය කරන ලද මෙම කෘතිය පිළිබඳව පණිවිඩය ජනතාව වෙත බෙදාහැරීමට ලැබීමට මට මහත් ගෞරවයක්. ශාස්ත්‍රීය පර්යේෂණයන් තුළින් මගේ සීයාගේ ජිවිතය පිළිබඳ උසස් නිර්මාණයක් ඉදිරිපත් කිරීමට කැප වූ මහින්ද මාහිමිපාණන්ගේ දායකත්වය බෙහෙවින් අගය කරනු ලබනවා. මලලසේකරයන්ගේ මානුෂීය කටයුතු හා කලාව පිළිබඳ ඔහුගේ ගැඹුරු දායකත්වය මෙන්ම ඉන් ඔබ්බට විහිදුණු ශාස්ත්‍රීය කටයුතු පිළිබඳව බලපෑම මෙම කෘතිය හරහා මැනවින් නිරූපණය වෙනවා. මලලසේකරයන්ගේ උරුමය සුරැකීම වෙනුවෙන් උන්වහන්සේගේ නොපසුබට කැපවීම පිළිබඳව අපි නැවතත් මහින්ද මාහිමිපාණන්ට ගෞරව පූර්වක ස්තුතිය පුදකර සිටිනවා”
ශ්‍රී ලාංකීය සමාජය තුළ මෙන්ම ලොව පුරා බෞද්ධ චින්තනයේ නොමැකෙන සටහනක් තැබූ විද්වතෙකු වෙනුවෙන් සිදුකරන ලද උපහාරයක් ලෙස “Professor Gunapala Malalasekera: A Photographic Portrait” ග්‍රන්ථය හැඳින්විය හැකිය. මලලසේකර පදනමේ මෙම ප්‍රකාශනය, මහාචාර්ය මලලසේකරයන් නිර්වචනය කළ සාරධර්ම සහ දැක්ම අනාගත පරපුර වෙනුවෙන් දායාද කිරීම සනිටුහන් කරයි.
වැඩි විස්තර සඳහා අමතන්න:
මලලසේකර පදනම
විද්‍යුත් තැපෑල: [email protected] දුරකථන: +94 (0)11-2345678
